WECAN TUNJUNG SETA TUMEKA KAKI SEMAR

GINUBAH DENING  : PANEMBAHAN PRAMANA SETA ING GIRIMAYA

1.  Kakang Semar lan Antaga kaki

ingsun meling mring sira kalihnya

kang dadya sesenggemané

ngirida gung lelembut

bala siluman nusa Jawi

kabyantokna sang nata

Hèrucakra Prabu

nata tedhaking barata

wijilira ing Ketangga sonyaruri

sajroning Alas Pudhak

2.  duk timurnya babaran Surandhil

ingkang ibu tedhaking Mataram

kang rama trahing rasulé

ginaip miyosipun

Sang Tunjung Séta jejuluk nèki

duk sih kineker mring Hyang

kesampar kesandhung

jalma samya katambuhan

tan wikan mring Pudhak sinumpet sinandi

déwa mangéjawantah

3.  wus pinasthi kang murbèng dumadi

Sang Tunjung Séta kinarya dhuta

jumeneng paranparané

ngadili  nusanipu n

ngastha darmaning

umum’

kalis ing madyané doya

wus wineleg mukti wibawaning diri

ing Ketangga siluman

4. satru mungsuh samya angemasi

tumpes tapis kataman prabawa

kasektèn sabda ciptané

nggegirisi balanipun

wujud kalabang kalajengking

sirullah ajinipun

prajurit lelembut

iku kang wekas ingwang

sira ndhèrèk angemong ing tembé wuri

sang nata binathara

5.  wong cilik samya suka ing ati

gumuyu murah sandhang lan tedha

guyub rukun sesamané

samya madhep sumujud

ngarsèng Hyang Widhi lan Njeng Gusti

wedi wewalatira

wingiting sang ratu

minangka jaman kencana

kakang Semar gya tindakna weling mami

ngirida gung lelembut

6.  manangka welingé sang aji

Sri Jayabaya nata binathara

mring sang pamong kalihé

kakang Semar umatur

pukulun Jayabaya aji

pun kakang wus anampa

kabèh sabdanipun

dadya paseksèning jangka

mangéjawantahira paduka aji

sang nata binathara

7.  jumenengira gusti pribadi

lamun jangkaning nusa tumeka

nora endhas lan buntuté

pun kakang wus sumagguh

ngemong Sang Tunjung Séta aji

lan ngirid byantokna

sagunging lelembut

sinigeg wawan sabdanya

Sri Jayabaya lan pamongnya kekalih

meca jangkaning nusa